روائع الشاعرة القديرة ايمان البكري !!!!!!!!!

السلام عليكم ورحمة الله وبركاته

دول قصيدتين من روائع الشاعرة القديرة ايمان البكري

بجد هي رهيبة حضرنا لها ندوة مرة في الجامعة ست رائعة وعظيمة وكلامها اغلبه بالعامية

بس له معاني كبيرة جدا وبتمس حاجات كتير اوي

مفيش حاجه

مانيش عايز خلاص حاجه

ولا محتاج أنا لحاجه

ولو عايز صحيح حاجه

مخليتوليش ولا حاجه

عموماً بصوا فيه حاجه

هقولها بس محتاج لعقول تفهم

ولو حاجة مهيش مفهومة او حاجه

نفسرها بكام حاجه

نوضحها بكام حاجه

وأهى حاجة مع حاجة

هتظهر وتبان لنا حاجه

وانا ما بخفش من حاجه

مانيش مسنود ولا حاجة

لكن ما بخفش من حاجه

لكن فرضاً لو هقول حاجه

هيحصل إيه ... ولا حاجه

هيعملوا إيه.... ولا حاجه

ولو بعد الشر .. بعد الشر

لو واحد من القاعدين

من السامعين من الضالين

فِهِم حاجة ..هَيعملوا إيه ؟

اكيد برضُه ولا حاجه !!.

فنتوكل على الستار

لوجه الله نقول حاجه

فيه ناس بتعيش علشان حاجه

وناس بتموت علشان حاجه

وناس بتموت على الحاجه

وناس تديلك الحاجه

وهى ليها محتاجه

وناس تديلك الحاجه

و تاخد قصادها ميت حاجه

وناس تكبر تكون حاجه

و ناس تصغر علشان حاجه

وناس منظر ومش حاجه

وتلقاه كبير حرس ونفير عليه منظر

وهو جبان وشيخ منصر ولا يبانش عليه حاجه

كلامى يا خلق فيه حاجه ؟؟

لحد دلوقتى فيه حاجه؟

كلام عادى وبسيط جداً ولا فِهشِ ولا حاجه

ما أنا ما أقدرش أقول حاجه .

صحيح نفسى أقول حاجه وميت حاجه

لكن مش قادر أقول حاجه

لأنى لو هقول حاجه

هييجى ناس بتوع حاجه

وياخدونى ورا الحاجه

وهوا ، لو سمع حاجه

هيعملوهالى ميت حاجه

عموما ...عموما

بصو لو حد من القاعدين

عايزنى أبلغه بحاجة

يقول مايخافش من حاجه

نعم ...... فيه إيه؟

ـ لالالالالأه مافيش سرقه

ولا تهليب ولا تهريب ولا حاجه.

وبتقول إيه؟؟

مصمصوا إيه؟؟

وخصخصوا إيه؟؟

ده كله كلام مفيش حاجه.

قضية إيه؟؟

ياشيخ روح

خـــــــــــلاص

مافيش حاجه.

حرامى إيه ؟؟

ولَكّح إيه؟؟

وهرّب إيه؟؟

شــفـافـيـه مافيش حاجه

وبتقول إيه ؟؟

لالالآلأ ه عيب لافيه تدليس

ولاترقيص ولا تدبيس ولا حاجه.

سمع مع هوووووووووس

أنا حاسس إنه فيه حاجه

دقيقة سكات

لَتبقى حداد!!.

أنا حاسس انه فيه حاجه.

زمنكوا ياخلق فيه حاجه

ولازموا كام وميت حاجه

ده لو يعنى إذا كان فيه حاجه

أنا عن نفسى مش حاسس ولا بحاجه

ولا متضااااااااااااااااااااايق ولا حاجه

سعادتك برضه مش زَيـىِ مافيش حاجه ؟

هـ أهـه ؟؟

بيقول مافيش حاجه

جنابك برضه مش زَيـىِ ؟؟

وعلشان زَيـىِ مافيش حاجه

أهـه بيضحك بيقول مافيش حاجه

ما أنا قولتلكو من الأول مافيش حاجه

عليا النعمه يا أخوانّا مافيه حاجه

ورحمة أبـويـا

ويّا أبـــوك

على إللّى جابوك ما فيه حاجه.

وعهد الله . وعهد الله. وعهد الله

ما خللولنا ولا حاجه.

بقولك إيه ؟؟

خلاص خلّص وفركش يا أخوانا

دستور يا اخوانا

دستور يا أسيادنا

دستور يا اخوانا يا بعدا

لأ سوري دستور م البعدا

محبوس حابس يا سيادنا

و بكاكي من فوق مدنة

و ورايا ديوك بيكاكو

حرصوا عالباقي معاكو

بركة مولانا هولاكو

حلت و علينا اللعنة

طرطور طرطر طراطير

بيغروا فالدساتير

و لا عاد فالحتة كبير

و يا وارث تورث مين

ما الورث إتباع و إتبعنا

نرجع تاني لموضوعنا

و بيان لديار الإفتا

من جمهورية زفتا

لعبو و عملوها إستفتا

صوت ياللي سامعنا

و قوللي ملك ولا كتابة

أسد شبل ف الغابة

و احلف وحياة راس بابا

زفة فمولد كدابة

و الله يجازي اللي خدعنا

للجوكر ألف تحية

ملعون خاش الحرية

يحيا قانون العبودية

و القوانين الوضعية

و الحكومات الشمولية

لها مني ألف تحية

وحياة أمي دي رجعية

و لو صوتنا و جعجعنا

واحد ولافيش غير هوه

قاعد متربع جوة

و بكيفك أو بالقوة

لو سوبر مان و فتوة

روح قله بقى يودعنا

عصابات شغل فتوات

و إستعباط على حركات

و السقا أبوه لو مات

حيقوم يسقي الشربات

و يكمل على مواجعنا

مزيكة و تراباتتو

و نفديك بالدم.. إفدوه

بس إحنا ورحمة أبوه

مين ده اللي حيلوي دراعنا

روح هاتلي لمون بالصودا

انا حاسة بريحة شوطة

حيصعدوا فصل الروضة

و الورث حيصبح موضة

لم الجدعان و اتبعنا

على قهوة ساقية مكي

نصرخ نلطم و حنبكي

ده ناويها و بيتكتكلي

قبل ما حتى يودعنا

ظقططوا يا عيال قولوا هيه

الحكم صبح تيك أواي

لو عايز قول أوكيه

و لو رافض قول أوكيه

في كلا الحالتين نوو واي

غير كودية و زار ينفعنا

لأنا عايزة بخور م الجاوي

و حمار أرمل و حصاوي

و دراع برغوت مش غاوي

تنطيط عفريت و مخاوي

شلة مقاطيع يقطعنا

حابس من شر الكرسي

من شر عزيزة و مرسي

من قرص النمل الفارسي

م الأحياء و الأموات

من كايرو إلى بغداد

أشتات أشتوت أشتات

حرصوا من لعب السيكا

م الحكشة و م البولوتيكا

و لا تشمت يوما فيكا

مارشيل بنت أم ماريكا

قول حاجة الله يهديكا

و ادعي معايا يخليكا

حلوا بقى عن أوجاعنا

و انصرفوا عليكوا اللعنة

انصرفوا عليكوا اللعنة

عاوزة اسمع رأيكم فيها وفي كلماتها لاني بجد بحترمها جدااااااااااا