الـمـنـظــــر

من قد ايه انا ملعبتش
تعبتْ همومي وما تعبتش
سافر الشباب على ارض الشيب
راحت سنيني وانا مارحتش
*******
نسيت اكبر
كبرت سنيني في ارض الخوف
شاخ البصر واتهد الشوف
والشعر الابيض بقى مكسوف
على الناس يظهر
نلعب اكبر
لعب مقدر
يعجبني لعبك اوي يا حياة
نحب فيكي نقول الآه
على العزيز الي فقدناه
وتقولّي اصبر
*******
نعد لميّه
وتعملي لينا مداويّة
وبايد خفيفة وحراميّه
بتسرقي الجرح وقساه
وقلوبنا ضمن التسليّه
تاخدي الولد ترميه شايب
والتسعة والعشرة قرايب
وتغلبيني وانا جايب
في اللعب اكتر
*******
زي السكر
ايديكي بتحسس دقني
وانتي صغيرة السني
عنيكي شايفة الكون الوان
ابيض واسود
عمرنا يبعد
الاقيكي بتقولي يا بابا
ليه يفطر القلب عذابا
في عنيكي نظرة جذابة
للروح تسحر
*******
ننسى ونكبر
نظرة عنيكي ترد الروح
لما بعود من الشغل واروح
شعرك على ضهرك مطروح
بدر منور
خدك نور
عمال اكبر
قوليلي ايه في زمانا صحيح
غير اني ارفض اموت مدبوح
وحياتنا بين كدب وتصريح
والكدب اكتر
*******
نظرة عنيكي تخبي حاجات
مكسوفة ولا شغل بنات
ما تكلميني بلاش حركات
اصفر واخضر
صبري هيغدر
عمال اكبر
يا عريس يا خفة يا متغندر
باديك خلاصة زهرة عمر
باحطلك قلبي في الاسر
لولا عنادها ما كنت اقدر*******
نفضل نكبر
فرحان اكبر وحزين اكبر
فاكر اكبر ونسيت اكبر
قلبي بيكبر عقلي بيكبر
صبر بيصغر
دنيا بتصغر
خلص المنظر
*******

مرسي ليك يا محمد كلام جميل اوي